Þyrla sækir slasaðan ferðamann

Björgunarsveitir Slysavarnafélagsins Landsbjargar á Austurlandi og Norðurlandi voru kallaðar út eftir hádegi í dag vegna erlends ferðamanns sem slasaðist í ánni Kreppu, sem er norðan Vatnajökuls.

Fram kemur í tilkynningu að ferðamaðurinn, sem var á göngu, gat hringt eftir aðstoð en ekki er vitað nákvæmlega um staðsetningu hans annað en það að hann er á sandeyri í ánni, kaldur og hrakinn og líklegast handleggsbrotinn.

Þyrla Landhelgisgæslunnar lagði af stað frá Reykjavík skömmu eftir klukkan eitt en um klukkustundarflug er á staðinn.