Samþykkt Icesave samnings tryggir betra lánshæfi ríkisins

Gangi endurfjármögnun bankanna eftir samkvæmt áætlun sem stjórnvöld kynntu á mánudag hefur náðst að uppfylla annað tveggja lykilatriða sem matsfyrirtækið Fitch Ratings fylgist með um þessar mundir til þess að geta tekið lánshæfismat Íslands af neikvæðum horfum.

David Riley, forstöðumaður lánshæfismats ríkissjóða hjá Fitch Ratings, segir að samþykkt Icesave samningsins gæti, ásamt endurfjármögnun bankanna, farið langleiðina með að tryggja lánshæfismat Íslands í fjárfestingaflokki. Þetta kemur fram í hagsjá Landsbankans.

Bloomberg fréttaveitan hefur þetta eftir David Riley, forstöðumanni lánshæfismats ríkissjóða hjá Fitch Ratings. Samkvæmt frétt Bloomberg er hitt lykilatriðið úrlausn Icesave málsins, en að mati Fitch væri samþykkt Icesave samningsins lokahnykkurinn sem þarf til að ríkið geti lokið fjárhagsáætlun til meðallangs tíma.

Sú áætlun sé nauðsynleg svo hægt verði að klára endurskoðun samkomulagsins við Alþjóðagjaldeyrissjóðinn og afgreiða lán frá honum og öðrum lánardrottnum. Ef allt gengur eins og áætlanir gera ráð fyrir segir Fitch það vera skýr skref í rétta átt sem munu hafa jákvæð áhrif á efnahagshorfur Íslands til meðallangs tíma og lánstraust ríkissjóðs.



Fer langleiðina með að tryggja lánshæfismat í fjárfestingaflokki

Ríkissjóður hefur nú lánshæfiseinkunnina BBB- hjá Fitch sem er lægsta mögulega einkunn í fjárfestingarflokki, þ.e. aðeins einu þrepi fyrir ofan svokallaðan spákaupmennskuflokk (e. non-investment grade).

Standard & Poor's gefur ríkissjóði sömu einkunn. Hins vegar gefur Moody's íslenska ríkinu einkunnina Baa1 sem er þremur þrepum ofan spákaupmennskuflokks. Allar einkunnir eru á neikvæðum horfum.

Lækki einkunn niður í spákaupmennskuflokk hefði það bæði áhrif á getu ríkissjóðs til útgáfu skuldabréfa (lántöku) svo og á þau vaxtakjör sem byðust af slíkri útgáfu. Flestar fjármálastofnanir, þar með taldir bankar, sjóðir og tryggingafélög, eru bundnar af reglum um tiltekið lánshæfismat þeirra fjármálagerninga sem þeim er leyfilegt að fjárfesta í.

Samþykkt Icesave samningsins gæti, ásamt endurfjármögnun bankanna, farið langleiðina með að tryggja lánshæfismat Íslands í fjárfestingaflokki.