Munu kaup Magma Energy á HS Orku hafa áhrif á gengi krónunnar?

Kanadíska fyrirtækið Magma Energy gæti eignast 32% hlut í HS Orku til viðbótar þeim 11% hlut sem þeir eiga nú þegar. Eins og komið hefur fram í kvöldfréttum Stöðvar 2 og á Vísi, gæti kaupverðið numið um 12 milljörðum króna.

Greiningardeild Kaupþings veltir fyrir sér hvort tilvonandi viðskipti komi fram í gjaldeyriskaupum á opinbera gjaldeyrismarkaðinum. Hinn möguleikinn segir Greiningardeildin vera þann að Magma Energy verði sér einfaldlega út um ódýrari krónur á utanlögsögumarkaði.

Ef sú leið yrði farin hefði það ekki áhrif á opinbera markaðinn fyrir krónur.

Fari upphæð af þessari stærðargráðu í gegnum opinbera gjaldeyrismarkaðinn er líklegt að áhrifin gætu verið talsverð til styrkingar krónunnar en þó aðeins tímabundið.

Um er að ræða 12 milljarða króna en til samanburðar má benda á að meðalvelta á millibankamarkaðnum hefur samsvarað 5 milljörðum króna á mánuði að meðaltali síðustu mánuði.

Taka ber fram að ekki hefur enn verið útlistað nákvæmlega með hvaða hætti kaupin fara fram, það er að segja hvort að greitt verði fyrir hlutinn í krónum eða evrum og hvort greitt sé fyrir hlutina alla í einu eða yfir ákveðið tímabil.

Sé upphæðin greidd í evrum hafa viðskiptin ekki bein áhrif á gengi krónunnar.