Samkynhneigðir heiðra Reykjavíkurborg

Reykjavíkurborg var afhent Stoltið, viðurkenning Hinsegin daga, á setningu hátíðarinnar í Háskólabíói í gærkvöld.

Hanna birna Kristjánsdóttir, borgarstjóri, veitti viðurkenningunni viðtöku, en hún var veitt fyrir stuðning borgarinnar við hátíðina í áratug. Á viðurkenningarskjalinu kemur fram að Reykjavíkurborg hafi sýnt að hún styðji jákvæða baráttu fyrir mannréttindum öllum til handa.

Í ávarpi sínu á setningarhátíðinni þakkaði Hanna Birna fyrir viðurkenninguna og sagði Hinsegin daga svo sannarlega hátíð allra borgarbúa; þeir séu táknrænn viðburður fyrir borgina sem við viljum búa í þar sem fólk býr við frelsi og hefur val um eigið líf og hamingju.

Þá skrifuðu Hanna Birna og Heimir Már Pétursson, framkvæmdastjóri Hinsegin daga og fréttamaður Stöðvar tvö, undir áframhaldandi samstarfssamning Hinsegin daga og Reykjavíkurborgar í gær. Með samningnum skuldbindur Reykjavíkurborg sig til að styrkja hátíðina um fjórar milljónir króna ár hvert, næstu þrjú árin.

Því fagnaði Heimir Már í ávarpi sínu og sagði Hinsegin daga ekki jafnglæsilega og raun ber vitni án stuðnings Reykjavíkurborgar.