Maradona biðst afsökunar á „hendi guðs“ - nokkurn veginn

Haft er eftir Diego Maradona í viðtali The Sun að hann sjái eftir markinu sem hann skoraði með „hendi guðs" í leik Argentínu og Englands á HM 1986.

Enn fremur sagði Maradona að Pele væri „the enemy of all time" - óvinur allra tíma.

Mörkin sem Maradona skoraði í umræddum leik eru líklegast frægustu mörk allra tíma. Eitt þar sem hann skoraði með hendinni og viðurkenndi það eftir leik. Hitt eftir að hafa spólað sig í gegnum ensku vörnina frá eigin vallarhelmingi.

Maradona hefur aldrei beðist afsökunar á fyrra markinu. Þar til nú, eftir því sem kemur fram í The Sun.

„Enskur stuðningsmaður kom upp að mér um helgina og bað mig um eiginhandaáritun. Hann sagði að ég væri goðsögn. Ég varð mjög glaður. Fólkið hér er svo kurteist og gott þrátt fyrir þá sögu sem ríkir á milli landanna okkar."

„Ef ég gæti beðist afsökunar og breytt gangi sögunnar myndi ég gera það. En markið stendur enn sem mark, Argentína varð heimsmeistari og ég var besti leikmaður heimsins."

Hann sagði ennfremur að eiturlyfjaneysla sín hafi tekið stóran toll af fótboltaferli sínum og hann tjáði sig einnig um kosningu FIFA um leikmann 20. aldarinnar sem fór fram á heimasíðu sambandsins árið 2000.

Maradona fékk flest atkvæði en FIFA breytti kjörinu þannig að Pele hlaut viðurkenninguna. Maradona mótmælti og þeir voru báðir heiðraðir.

„Það væri ekki hægt að deila um hver besti knattspyrnumaður allra tíma er - ég eða Pele. Allir myndu velja mig," sagði hann. „Pele er óvinur allra tíma."

Maradona sagði einnig að Beckham ætti skillið að spila sinn 100. landsleik með Englandi en að hann ætti ekki heima í flokki bestu knattspyrnumanna heims. Hann sagði einnig að Ashley Cole ætti að einbeita sér að fótbolta en ekki kvennafari.

Hann gagnrýndi einnig Steve McClaren fyrir að velja Scott Carson fram yfir Paul Robinson fyrir leikinn mikilvæga gegn Króatíu í undankeppni EM 2008 í haust.