Útflutningur á áli hefur tvöfaldast á einu ári

Mikil aukning er í útflutningi á áli, en á föstu gengi tvöfaldaðist verðmæti álútflutnings í ágúst miðað við sama mánuð í fyrra. Á fyrstu 8 mánuðum ársins hefur verið flutt út 65% meira af áli en á sama tímabili í fyrra.

Greining Glitnis fjallar um vöruskiptin við útlönd í Morgunkorni sínu. Þar segir að útflutningurinn á áli síðustu mánuði virðist þó hafa verið heldur minni en efni standa til miðað við framleiðslugetu og er ekki úr vegi að ætla að hann muni sækja í sig veðrið að nýju.

Útflutningur sjávarafurða hefur einnig verið með minna móti upp á síðkastið og er von til þess að þar verði nokkur aukning á næstu mánuðum.

Á fyrstu 8 mánuðum ársins var vöruskiptahallinn 45 milljarðar kr. en var 82 milljarðar kr. á sama tímabili í fyrra. Viðsnúningurinn er enn snarpari ef tekið er með í reikninginn að gengi krónu var 19% lægra að meðaltali á þessu tímabili í ár en á sama tíma í fyrra.