Segir krónuna hafa lækkað miklu meira en efni standa til

Krónan hefur lækkað miklu meira en efni standa til að mati Geirs H. Haarde forsætisráðherra. Hann segir ástandið á alþjóðlegum fjármálamörkuðum vera ótryggt en telur að krónan eigi eftir að styrkjast.

„Auðvitað veit ég ekki frekar en hver annar hver þróunin verður. það er annað að krónan er núna miklu verðminni. Hún hefur lækkað miklu meira en raunveruleg efni standa til en menn líta til grunnþátta í okkar efnhagslífi. Hún á eftir að styrkja sig hvort sem það verður á mánudaginn eða eitthvað seinna," sagði Geir.

Bankastjórn Seðlabanka Ísland og ríkisstjórnin hafa verið harðlega gagnrýnd fyrir aðgerðarleysi. Geir vísar þessari gagnrýni á bug. „Menn koma með alls kyns bjargráð af öllu tagi, svona meira og minna út í loftið. stundum finnst manni nú að þeir sem eru að tjá sig um þessa hluti hafi ekki alveg forsendur til þess eða hafi ekki kynnt sér álit til hlítar," sagði hann enn fremur.

Geir segir ástandið á alþjóðlegum fjármálamörkuðum vera alvarlegt. Hann telur að fyrirhugaðar björgunaraðgerðir bandaríkjastjórna fyrir þarlenda fjármálamarkaði geti haft verulega þýðingu fyrir heimsmarkaðinn.

„Ástandið eins og allir vita er ótryggt og það er mikil óvissa sem meðal annars helgast af því að það er verið að fara með hluti í gegnum Bandaríkjaþing sem geta haft gríðarleg áhrif um heim allan. Það er ekki spurning um að þetta hefur mjög mikið að segja fyrir allan fjármálamarkað heimsins.