Landsbankinn ekki að bjarga sér frá þroti

Halldór J. Kristjánsson, bankastjóri Landsbankans segir það fjarri að Landsbankinn hafi selt eignir sínar til að bjarga sér frá þroti. Bankinn hafi styrkst og ætli nú að einbeita sér að almennri bankaþjónustu.

„Við höldum áfram fyrst og fremst sem alhliða banki. Við viljum einbeita okkur að sérhæfðum lánaverkefnum, fyrirtækjaráðgjöf í tengslum við það," segir Halldór.

Halldór segir að menn hafi rætt þetta mál á undanförnum vikum en segir það firru að þetta skref hafi verið tekið til að bjarga bankanum frá þroti. „Nei, nei, Þetta er bara gert til að ná fram góðri verkaskiptingu þannig að menn séu einbeittir í því sem þeir eru að gera," segir Hallór enn fremur.

Halldór segir Landsbankann sterkan og að engar líkur séu á að Landsbankinn eða Kaupþing fari sömu leið og Glitnir. Aðspurður hvort breytingarnar hefðu nokkuð gerst í góðæri segir Halldór að í góðæri jafnt sem mánuðum sem þessum þurfi menn sífellt að hugsa um það hvort þeir séu að einbeita sér nógu vel að réttum hlutum.