Móðir fórnarlambsins: Hrottalegar aðfarir lögreglu

Móðir piltsins sem lögreglumaður tók kverkataki í verslun 10-11 í gær segir aðfarir lögreglumannsins hrottalegar en fjölskyldan hefur ekki tekið ákvörðun um hvort atvikið verði kært. Lögreglumaðurinn mun ekki sinna lögreglustörfum á meðan málið er í rannsókn.

„Mér finnst þetta hrottalegar aðfarir og þetta hlýtur að vera slæmt fyrir ímynd lögreglunnar að koma svona fram við ungt fólk. Þetta ber vott um mikið virðingarleysi í þeirra garð," segir móðirin í samtali við Vísi og bætir því við að tilhæfulaust ofbeldi sé aldrei réttlætanlegt.

Hún segir að sonur sinn hafi farið til vinnu í morgun en að hann sé aumur í skrokknum eftir aðfarirnar þegar hann var keyrður í gólfið og handjárnaður. Að því loknu var farið með hann niður á lögreglustöð en honum sleppt stuttu síðar.

„Maður hlýtur að spyrja sig hvers konar framkoma þetta sé, þetta hefði getað farið mjög illa," segir hún.

Myndband af atvikinu má sjá hér.