Segir hnökra í gjaldeyrisviðskiptum fara minnkandi

Seðlabankinn segir að hnökrar í gjaldeyrisviðskiptum, eins og hann kallar það, fari minnkandi nú með hverjum deginum en enn séu í gildi tilmæli frá því á föstudag um gjaldeyrishöft.

Í tilkynningu bankans segir að á meðan viðskiptabankarnir þrír séu að hefja starfsemi eftir þær breytingar sem átt hafa sér stað á eignarhaldi þeirra hafi orðið tafir á gjaldeyrisviðskiptum. ,,Hnökrarnir hafa þó farið minnkandi. Landsbankinn hefur hafið starfsemi undir merkjum nýs eiganda og hann sinnti hluta gjaldeyrisviðskipta í dag. Þegar formbreytingu annarra viðskiptabanka er lokið hefja þeir einnig gjaldeyrisviðskipti. Tilmæli frá Seðlabanka Íslands frá því síðastliðinn föstudag um temprun viðskipta eru enn í gildi," segir Seðlabankinn.

Þá segir bankinn að áfram sé unnið að því að koma gjaldeyrisviðskiptum í rétt horf í samstarfi Seðlabanka Íslands og annarra fjármálastofnana.