Hagnaður Eyris 298 milljónir

Eftir skatta nemur hagnaður fjárfestingarfélagsins Eyris Invest 298 milljónum króna á fyrri helmingi ársins. A sama tíma í fyrra nam hagnaðurinn 2,2 milljörðum króna. Fyrir skatta tapar félagið 1,4 milljörðum króna á fyrri helmingi ársins.

Árni Oddur Þórðarson, forstjóri Eyris, segir að miðað við erfiðar aðstæður á fjármálamörkuðum séu forsvarsmenn félagsins sáttir við að skila lítils háttar hagnaði á fyrri hluta ársins. Hann segir mest um vert að Eyrir hafi skilað góðri ávöxtun í fortíð og hafa þolinmæði og styrk til að grípa þau tækifæri sem kunni að myndast í náinni framtíð.

„Frá stofnun Eyris Invest á miðju ári 2000 hefur árleg hækkun á innra virði hlutafjár numið 39,8 prósentum að meðaltali til samanburðar við 6,0 prósenta neikvæða árlega meðalávöxtun heimsvísitölu MSCI,“ segir í tilkynningu.

Heildareignir Eyris í lok uppgjörstímans námu rúmum 58 milljörðum króna, en kjölfestueignir eru Marel Food Systems, Össur og iðnsamstæðan Stork í Hollandi. Afkoma þessara kjölfestueigna er sögð hafa verið góð fyrstu sex mánuði ársins og horfur í rekstrinum góðar.

Eigið fé Eyris er 18,2 milljarðar króna og eiginfjárhlutfall 31,3 prósent. Í tilkynningu kemur fram að væri laust fé notað til endurgreiðslu skulda myndi eiginfjárhlutfallið reiknast fjörutíu prósent.