Andrés stofnar almannatengslafyrirtæki

Nýtt almannatengslafyrirtæki hóf starfsemi nú um mánaðarmótin og hefur það hlotið nafnið Góð samskipti. Stofnandi er Andrés Jónsson.

Andrés hefur starfað við blaðamennsku, markaðsmál og almannatengsl í rúman áratug. Síðast starfaði Andrés sem kynningarstjóri hjá bílaumboðinu B&L og þar áður tók hann þátt í stofnun fréttavefsins Eyjan.is.

„Það hefur lengi verið draumur minn að stofna eigið fyrirtæki. Það má segja að kreppan hafi flýtt þeim áformum. Ég mun halda áfram að sinna almannatengslum fyrir B&L, en hætti í föstu starfi. Með stofnun Góðra samskipta ehf. get ég nú tekið að mér fleiri skjólstæðinga," segir Andrés í tilkynningu.

Helstu verkefni Góðra samskipta eru á sviði almannatengsla, fjölmiðlasamskipta, framkomuþjálfunar, atburðastjórnunar og gerð kynningarefnis eftir því sem fram kemur í tilkynningunni.

Góð samskipti eru til húsa í Ármúla 18 í Reykjavík. Vefsíða fyrirtækisins er á slóðinni www.godsamskipti.is og bloggsíðan á www.godsamskipti.blog.is.