Kaupþing Banki í nýrri NASDAQ OMX 100 vísitölu

NASDAQ OMX Group, Inc. tilkynnti í dag um vísitölu, NASDAQ OMX 100 IndexSM sem er nýtt alþjóðlegt fjárfestingarviðmið fyrir NASDAQ OMX Group.

Kaupþing Banki er eitt íslenskra félaga í nýju vísitölunni. NASDAQ OMX 100 er markaðsvegin vísitala sem samanstendur af 100 stærstu félögum á skrá í sameinuðum kauphöllum NASDAQ OMX Group.

„Það er fagnaðarefni að sjá Kaupþing banka meðal 100 stærstu í nýrri sameiginlegri vísitölu NASDAQ OMX. Meðal þekktra fyrirtækja í vísitölunni má nefna Microsoft, Apple, Nokia og Google. Þessi vísitala er fyrsta sameiginlega afurðin sem kynnt er í kjölfar samruna umræddra kauphalla. Reikna má með að fjárfestar um allan heim muni fylgjast vel með þessari vísitölu," segir Þórður Friðjónsson forstjóri Nordic Exchange á Íslandi:

Hreiðar Már Sigurðsson, forstjóri Kaupþings tekur í sama streng: „Það er mjög ánægjulegt að vera hluti þessarar nýju vísitölu NASDAQ OMX. Þetta eykur sýnileika okkar um allan heim, ekki síst Bandaríkjunum og er okkur áskorun til öflugrar starfsemi á alþjóðlegum vettvangi."

NASDAQ OMX 100 samanstendur af 100 stærstu félögum á skrá í NASDAQ OMX kauphöllunum í Bandaríkjunum, Svíþjóð, Danmörku, Finnlandi og á Íslandi. Vísitalan tekur mið af ýmsum atvinnugeirum og vegur tæknigeirinn þyngst en á eftir honum koma heilbrigðisgeirinn, iðnaðargeirinn, neysluvörugeirinn og fjármálageirinn. 3982 félög eru skráð á NASDAQ OMX.

NASDAQ OMX 100 Index er reiknuð út í rauntíma í öllum sameinuðu

kauphöllunum og er birt í dollurum og evrum. Útreikningar vísitölunnar

hófust í dag með gildinu 1500.00.