REI verður hlutafi í Geysi Green Energy

Gert er ráð fyrir að Reykjavik Energy Invest verði hluthafi í Geysi Green Energy þegar Enex og Geysir Green sameinast á næstunni. Stjórnir bæði Enex og Geysis Green hafa samþykkt þann samruna.

Viðskiptablaðið greinir frá því í dag að Geysir Green og Enex hyggi á sameiningu en bæði starfa að útrás í orkumálum. Að sögn Ásgeirs Margeirssonar, forstjóra Geysi Green Energy, er samruni félaganna enn í úrvinnsluferli en reiknað er með að hann gangi í gegn á næstu einum til tveimur mánuðum.

Geysir á nú þegar 73,1 prósent í Enex eftir að hafa tryggt sér um fjórðungshlut Landsvirkjunar í félaginu í haust en afganginn, um 26,5 prósent, á Reykjavik Energy Invest, dótturfélag Orkuveitunnar. „Hugmyndin er sú að REI fái hlutabréf í Geysi Green í staðinn fyrir hlut sinn í Enex," segir Ásgeir. Hann bendir á að þar sem Geysir Green sé mun stærra félag í Enex nemi hlutur REI í hinu sameinaða félagi nokkrum prósentum. Ásgeir segir málið á beinni braut og segir aðspurður að fulltrúi REI í stjórn Enex, Guðmundur Þóroddsson, hafi samþykkt að vinna að sameiningunni.

Eins og kunnugt er var samruni Geysis Green og REI blásinn af í haust, meðal annars vegna umdeildra kaupréttarsamninga og hins svokallaða 20 ára samnings. Ásgeir segir að REI og Geysir Green muni nú ekki rugla saman reytum að öðru leyti en því að REI verður hluthafi í Geysi Green.

Viðskiptablaðið greindi einni frá því í dag að Ólafur Jóhann Ólafsson og bandaríski fjárfestingarbankinn Goldman Sachs væru nú að leggja lokahönd á kaup á 8,5 prósenta hlut í Geysi Green Energy. Ásgeir bendir á að það hafi staðið til frá því í haust að þessir aðilar kæmu að félaginu en málið sé enn í vinnslu.

„Þetta er þó ekki búið fyrr en þetta er búið," ítrekar Ásgeir og bendir á að miklar breytingar hafi orðið í kringum Geysi á síðustu mánuðum. FL Group hafi selt sinn hlut í félaginu og þá hafi málefni REI og Geysis Green einnig haft áhrif á starfið. Aðspurður segist Ásgeir vona að gengið hafi verið frá kaupum Ólafs Jóhanns og Goldman Sachs fyrir aðalfund Geysis sem verður í kringum næstu mánaðamót.