Einar vill fara frá Flensburg

Einar Hólmgeirsson segir að hann vilji fara frá þýska úrvalsdeildarliðinu Flensburg enda fái hann afar fá tækifæri hjá liðinu.

„Það má segja að draumurinn hafi breyst í martröð hjá mér hér í Flensburg. Því er alls ekki að leyna að ég vil fara frá félaginu þar sem núverandi staðan mín er óskemmtileg," sagði Einar í samtali við Morgunblaðið.

Þjálfari liðsins, Kent-Harry Andersson, hefur notað Einar afar lítið á tímabilinu og má því helst kenna um að stjórn félagsins sá um að fá Einar til liðsins á meðan að hann var í veikindaleyfi. Andersson var því ekki hafður með í ráðum og vill nota Einar til að senda skilaboð til stjórnar félagsins.

„Það er alveg sama á hverju gengur í leikjum, ég fæ engin tækifæri hjá Anderson. Hann lætur frekar hægrihandarmann í mína stöðu en að setja mig inn á leikvöllinn," segir Einar enn fremur.

Einar skrifaði undir þriggja ára samning við Flensburg á síðasta ári en reiknar með að mæta skilningi hjá forráðamönnum liðsins sem muni sleppa honum fyrir ásættanlegt verð.

Hann lék í þrjú ár með Grosswallstadt í þýsku úrvalsdeildinni áður en hann gekk til liðs við Flensburg.