Hvað hefur þessi Beckham gert?

Dálkahöfundurinn T.J. Timers hjá LA Times lætur knattspyrnumanninn David Beckham hafa það óþvegið í pistli sínum í blaðinu í dag. Hann segir körfuboltamanninn Kwame Brown hjá LA Lakers hafa skilið meira eftir sig í Los Angeles en Beckham.

Simers rekur það í pistli sínum hvernig hann sé búinn að reyna að fá viðtal við David Beckham alla 213 dagana sem knattspyrnumaðurinn hefur dvalið í Los Angeles, en án árangurs. Hann veltir því fyrir sér hvernig geti verið að maður sem hefur aðeins spilað átta leiki fyrir LA Galaxy geti verið jafn "þreyttur og önnum kafinn" eins og talsmenn hans bera við þegar á að reyna að fá viðtal við hann.

Simers segist ekki hissa á því að Beckham hafi ekki verið valinn í enska landsliðið þegar hann hafi ekki orku í að sitja eitt viðtal við LA Times - viðtal sem hann sé margbúinn að lofa en hafi alltaf svikið.

Pistlahöfundur veltir því fyrir sér hvernig Beckham hafi þá haft orku í að dansa við Janet Jackson á Grammy-verðlaunateiti á dögunum og hvort geti verið að hann hafi verið við tökur á "Father-Hood" þáttunum með Snoop Dogg um daginn þegar hann lofaði sig í viðtal á mánudegi - sem síðar var aflýst. Samt hafi hann fundið tíma til að veita Hollywood leikkonunni Selmu Hayek viðtal á góðgerðasamkomu sem haldin var á vegum Madonnu - en reyndar hafi hann fengið 350,000 dollara fyrir viðvikið.

Beckham hafi líka haft tíma til að fá sér nýtt tattú á vinstri handlegginn - berbrjósta engil sem hann segi vera Victoriu konu sína - fyrir 5,000 dollara.

Simers gefur lítið út á fullyrðingar manna við komu Beckham til LA - að hann hafi átt að vera maðurinn sem bjarga átti amerískri knattspyrnu. Beckham hafi gert minna af því að spila og það eina sem hann sé með í gangi núna sé nærbuxnaauglýsingin hans fræga. Simers þykir reyndar skrítið að svona efnaður maður eins og Beckham virðist ekki hafa efni á nærbuxum í réttri stærð - þær sem hann klæðist í auglýsingunni séu full þröngar fyrir sinn smekk.

Nei, Beckham er ekki merkilegur pappír að mati pistlahöfundarins. Hann hafi meiri áhyggjur af almannatengslaher sínum en þeim sem borga honum laun.

Beckham, segir Simers, hefur ekki skilið meira eftir sig en miðherjinn Kwame Brown sem skipt var frá LA Lakers á dögunum, en áhorfendur í Staples Center bauluðu á Brown í síðustu leikjum sínum fyrir Lakers og olli hann þeim gríðarlegum vonbrigðum.

"David hefði nú geta bætt upp fyrir allan þennan tíma í meiðslum með því að veita a.m.k. nokkur viðtöl, en svo virðist sem hann sé ekki beittasta verkfærið í skúffunni og því vilji konan hans sjá um að tala fyrir hann - vilji ekki skilja hann eftir einan hjá blaðamönnum," veltir Simers fyrir sér í niðurlagi pistilsins.

"Gott og vel - leyfið mér þá að taka viðtal við Posh."