FL Group tapar 67 milljörðum

Fram kemur í tilkynningu frá FL Group til Kauphallarinnar að heildareignir félagsins hafi aukist um 60 prósent í fyrra og námu 422 milljörðum í árslok. Meðal nýrra eigna félagsins voru Tryggingamiðstöðin sem keypt var í fyrra. Eigið fé var um 156 milljarðar króna í lok árs sem er aukning um 13,2 milljarða króna frá árslokum 2006. Aukningin skýrist m.a. af hlutafjáraukningu í tengslum við kaup félagsins á Tryggingamiðstöðinni og fasteignafélögum af Baugi Group á síðari hluta ársins.

FL Group segir að við birtingu ársreiknings hafi FL Group endurfjármagnað andvirði 47,1 milljarða króna af lánum með gjalddaga árið 2008 en eftir standa um 8,5 milljarðar.

Hafa selt hluti í AMR, Finnair og Commerzbank fyrir 80 milljarða

Bent er á að félagið hafi lagst í umfangsmiklar skipulagsbreytingar á félaginu, markaðsáhætta minnkuð og Kaupmannahafnarskrifstofu lokað. Í þessu sambandi má einnig benda á að félagið minnkaði hlut sinn í AMR, móðurfélagi American Airlines, og Finnair. Seldir voru hlutir fyrir 35,2 milljarða króna. Þá seldi félagið hlut í Commerzbank fyrir 20,7 milljarða. Til viðbótar hefur félagið selt bréf í bankanum fyrir um 34 milljarða króna. Auk þess var eignasafn undir Markaðsviðskiptum minnkað um 29 milljarða tilviðbótar á fjórðungnum.

Kjarnaeignir FL Group eru í Glitni banka, Tryggingamiðstöðinni og Landic Property og mun félagið halda áfram að vinna með stjórnendum þessara félaga og styðja framtíðarvöxt þeirra og arðsemi, eftir því sem segir í tilkynningu.

Telja rekstur kjarnaeigna geta staðið af sér óróa

„Órói á erlendum fjármálamörkuðum á síðari hluta ársins 2007 hafði mikil og bein áhrif á okkar afkomu þar sem verðmæti allra okkar helstu eigna hefur lækkað umtalsvert. Við teljum hinsvegar að rekstur okkar kjarnaeigna standi vel og að FL Group geti staðið af sér frekari óróa á markaði og í framhaldinu skoðað áhugaverð tækifæri," segir Jón Sigurðsson, forstjóri FL Group.

„Við höfum brugðist hratt við breyttum aðstæðum á mörkuðum og markvisst minnkað markaðsáhættu félagsins í hlutabréfum, ásamt því að auka hlutafé félagsins. Jafnframt höfum við lokað skrifstofu okkar í Kaupmannahöfn og er það liður í lækkun rekstrarkostnaðar félagsins. Með endurfjármögnun undanfarinna vikna, ásamt framangreindum aðgerðum höfum við staðið vörð um fjárhagslegan styrk félagsins."