Benitez: Blaðamaðurinn laug

Rafael Benitez segir að það sé ekki rétt sem komi fram í News of the World í dag, að hann kenni eigendum liðsins um slæmt gengi að undanförnu.

Eins og kom fram í Vísi í morgun segir í grein í blaðinu að Benitez gæti verið með fullkomna afsökun fyrir slöku gengi ef hann vildi.

„Svona vinnubrögð koma ekki á óvart. Allir í Liverpool vita að það er ekki hægt að treysta tveimur dagblöðum - þetta er annað þeirra. Blaðamaðurinn skrifar greinina eins og um einkaviðtal væri að ræða en það er ekki rétt. Ég var að ræða við spænska blaðamenn og hann sneri úr öllu sem ég sagði. Þannig að hann er að ljúga," sagði Benitez rétt fyrir leik Liverpool gegn Chelsea í dag.