Wise á leið til Newcastle

Forráðamenn Leeds hafa staðfest að knattspyrnustjórinn Dennis Wise hafi verið látinn laus frá félaginu til að ganga í starfslið Kevin Keegan hjá Newcastle í úrvalsdeildinni.

Enn hefur ekki verið staðfest hvaða starf Wise tekur að sér hjá Newcastle, en hann þekkir Keegan vel eftir að hafa spilað undir hans stjórn hjá enska landsliðinu á sínum tíma.

Þessi tíðindi eru stuðningsmönnum Leeds mikið áfall, því Wise hefur unnið mjög gott starf hjá félaginu síðan hann tók þar við. Wise tók við Leeds með 15 stig í mínus í C-deildinni, en hefur komið því í baráttu um að komast upp um deild.

Leeds hefur samþykkt greiðslu frá Newcastle fyrir að láta Wise af hendi og mun hann ljúka starfi sínu hjá Leeds annað kvöld.