Heimsmeistararnir mæta Evrópumeisturunum í dag

Sex leikir eru á dagskrá Evrópumótsins í handbolta í dag og tekur Vísir hér saman hvað er undir í leikjunum.

Milliriðill 1

15.15 Króatía - Svartfjallaland

Um er að ræða algjöran skyldusigur fyrir Króata en Svartfellingar hafa enn ekki unnið leik á mótinu. Liðið komst í milliriðlakeppnina á jafntefli við Rússa og töpuðu í gær fyrir Slóvenum, 31-29.

Króatar töpuðu hins vegar sínum fyrsta leik á EM í gær er liðið var tekið í kennslustund af Dönum, 30-20.

Úrslitin þýða að hörð barátta er framundan um sæti í undanúrslitunum og má Króatía alls ekki við því að misstíga sig aftur.

17.15 Pólland - Danmörk

Þessi leikur er upp á líf og dauða fyrir Pólverja sem náðu öðru sætinu á HM í fyrra. Í gær gerði Pólland jafntefli við Noreg og stendur verst af þeim fjórum liðum í 1. milliriðli sem keppa um sætin tvö í undanúrslitunum.

Ef Danmörk vinnur hins vegar leikinn stendur liðið vel að vígi fyrir lokaumferðina.

19.15 Slóvenía - Noregur

Slóvenar eiga enga von um að komast í undanúrslitin en gætu gert atlögu að þriðja sætinu í riðlinum. Slóvenar unnu Svartfellinga í gær en það var aðeins annars sigur þeirra á mótinu. Þeir eiga því enn eftir að sanna sig gegn sterkari þjóðum mótsins og vilja sjálfsagt gera það, þó ekki nema bara stoltsins vegna.

Gestgjafarnir hafa verið afar sterkir á þessu móti en voru fyrirfram ekki taldir líklegir til að ná alla leið í undanúrslitin. Norðmenn gerðu jafntefli við Pólverja í gær og töpuðu þar með sínum fyrstu stigum á mótinu.

Nú er hins vegar spurning hvort að bólan springi eða Norðmenn taka enn eitt skref í átt að verðlaunasæti á mótinu.

Milliriðill 2

15.15 Spánn - Svíþjóð

Þetta er gríðarlega þýðingarmikill leikur fyrir bæði lið. Tap þýðir að sæti í undanúrslitunum verði afar fjarlægur draumur, sérstaklega fyrir Spánverja sem töpuðu í gær fyrir Frökkum, 28-27.

Svíar gerðu jafntefli við Ungverja og naga sig sjálfsagt í handabökin í dag.

Bæði lið þurfa nauðsynlega á því að halda að Frakkar vinni Þjóðverja í dag. Ef Þjóðverjar vinna verður erfitt að velta bæði Frakklandi og Þýskalandi úr efstu tveimur sætum riðilsins.

17.15 Þýskaland - Frakkland

Þarna mætast núverandi heimsmeistarar og Evrópumeistarar. Frakkar eru eina þjóðin á mótinu sem hafa unnið alla leiki sína til þessa og þykja gríðarlega öflugir.

Frakkar unnu í gær Spánverja en Spánn vann átta marka sigur á Þýskalandi í riðlakeppninni.

Með sigri tryggja Frakkar sér sigur í riðlinum og um leið sæti í undanúrslitum keppninnar. Það er því að miklu að keppa fyrir þá því þar með geta þeir hvílt sig í lokaumferð milliriðlakeppninnar fyrir átökin um helgina.

Þjóðverjar vilja þó vitaskuld vinna leikinn í dag enda liðið í góðri stöðu eins og er.

19.15 Ungverjaland - Ísland

Ísland á enn veika von um að ná þriðja sætinu í riðlinum en þurfa þá að vinna báða leiki sína sem eftir eru í milliriðlinum og treysta á hagstæð úrslit í öðrum leikjum.

Strákarnir okkar eru þó fyrst og fremst að spila upp á stoltið eftir að hafa verið hreinlega niðurlægðir í þremur af fjórum leikjum sínum á mótinu.

Ungverjar hafa komið á óvart og unnu til að mynda Spánverja á fyrsta keppnisdegi mótsins. Liðið náði jafntefli gegn Svíþjóð í gær og ætla sér örugglega sigur í kvöld enda sæti í undanúrslitunum enn raunhæfur möguleiki fyrir þá.