Óli Stef: Þetta var katastrófa

"Það var fyrst og fremst sóknarleikurinn hjá okkur sem fór úrskeiðis í dag, ég held að flestir sem hafa eitthvað vit á handbolta hafi séð það," sagði Ólafur Stefánsson í samtali við Rúv eftir tap Íslendinga gegn Svíum á EM.

"Vörnin hjá okkur var betri en oft áður og það sem við lögðum upp með þar var að ganga upp, sérstaklega í fyrri hálfleik og framan af seinni - og þegar svo er erum við vanir að rúlla yfir þessi lið - en í dag gerðist bara einhver katastrófa, eitthvað stórslys, sem ég hef ekki séð lengi frá okkar mönnum. Það sem keyrði okkur um koll vorum við sjálfir," sagði Ólafur.