Stór hlutafjáraukning hjá Actavis til að efla þróunnar- og markaðsstarf

Stór hlutafjáraukning er framundan hjá Actavis til að efla ennfrekar þróunnar- og markaðsstarf félagsins. Alls nemur aukningin 25 milljörðum kr. og þar af mun Björgólfur Thor Björgólfsson leggja fram 80% eða 20 milljarða í gegnum Novator.

Ásgeir Friðgeirsson talsmaður Novators segir að styrkleiki Actavis liggi fyrst og fremst í öflugu þróunnarstarfi á sviði samheitalyfja og markaðssetningu á þeim lyfjum.

"Markmiðið er að vera tilbúinn með lyfið á markað um leið og einkaleyfið á því fellur niður og að vera snöggir að því," segir Ásgeir. "Hlutafjáraukningin er fyrst og fremst til að efla og styrkja undirstöðuna að þessu leyti."

Ásgeir segir að Novator hafi þarna séð ágætan hest til að veðja á í framtíðinni. Hvað varðar aðkomu annarra hluthafa að aukningunni segir Ásgeir að hann viti ekki hvort allir verði með.

Hinsvegar hefur komið fram opinberlega að næststærsti hluthafinn, Salt Invest sem á tæp 10%, muni leggja til 2,5 milljarða í hlutafjáraukninguna.