Bestu markverðir ensku úrvalsdeildarinnar

Blaðamenn The Sun hafa tekið saman lista yfir tíu bestu markverði ensku úrvalsdeildarinnar að þeirra mati. Þessi listi er vel umdeilanlegur enda valið erfitt.

10. Joe Hart

Það er mikið af ungum og efnilegum enskum markvörðum í úrvalsdeildinni en óvíst er hversu langt Scott Carson, Chris Kirkland og Ben Foster munu ná. Joe Hart hjá Manchester City hefur sýnt það að hann hefur það sem þarf til að verða landsliðsmarkvörður Englands í framtíðinni.

9. Mark Schwarzer

Schwarzer skipti óvænt yfir í Fulham fyrir tímabilið eftir áratug hjá Middlesbrough. Þessi ástralski markvörður hefur leikið frábærlega í marki Lundúnaliðsins á tímabilinu.

8. Jussi Jaaskeilainen

Þessi finnski markvörður hefur þegar leikið yfir 400 leiki á 12 árum hjá Bolton en nóg er eftir á tankinum hjá þessum 33 ára leikmanni. Hefur oft varið markið hetjulega og á stóran þátt í veru Bolton í efstu deild.

7. Robert Green

Hefur tekið miklum framförum og er í miklum metum hjá stuðningsmönnum West Ham fyrir frammistöðu sína síðustu þrjú tímabil.

6. Brad Friedel

Náði ekki að festa sig í sessi sem aðalmarkvörður Liverpool. Þegar hann yfirgaf Anfield bjuggust fáir við því að hann yrði einn besti markvörður ensku úrvalsdeildarinnar. En hann sýndi hjá Blackburn hve öflugur hann er og heldur nú uppteknum hætti hjá Aston Villa.

5. Edwin van der Saar

Sir Alex Ferguson sér væntanlega ekki eftir því að hafa ekki krækt í þennan markvörð fyrr. Fyrsti markvörðurinn sem náð hefur að festa sig almennilega í sessi á Old Trafford síðan Peter Schmeichel lagði hanskana á hilluna. Varði vítaspyrnu Nicolas Anelka á síðasta tímabili og tryggði United sigur í Meistaradeildinni.

4. David James

Verður bara betri með aldrinum. Hefur leikið frábærlega með Portsmouth og endurheimt stöðu sína sem aðalmarkvörður enska landsliðsins. Gæti verið á toppi listans ef hann ætti það ekki til að fara í skógarferðir.

3. Shay Given

Hefur mátt þola það að spila með allskonar jólasveinum í vörninni fyrir framan sig. Á stóran þátt í því að Newcastle hefur ekki fengið markaregn á sig í hverjum einasta leik.

2. Pepe Reina

Fáir stuðningsmenn Liverpool vissu hver Reina væri þegar hann kom frá Villareal 2005. En sá spænski hefur verið mjög traustur síðan hann kom. Ef Liverpool lendir í vítaspyrnukeppni veistu á hvað best er að leggja peningina þína á.

1. Petr Cech

Hársbreidd á undan Reina á þessum lista. Markvörður sem er á algjörum heimsklassa. Margir vilja meina að hann sé ekki jafn öruggur og hann var eftir að hafa lent í slæmum höfuðmeiðslum gegn Reading fyrir tveimur árum en það kemur ekki í veg fyrir að hann vermi toppsæti listans.