Afborganir á myntkörfulánum verði frystar

Í ljósi efnahagsástandsins beinir ríkisstjórn Íslands þeim tilmælum til Fjármálaeftirlitsins og til stjórna Nýja Landsbankans hf. og Nýja Glitnis hf., að frystar verði afborganir skuldara á myntkörfulánum, sérstaklega vegna húsnæðislána, þar til ró kemst á gjaldeyrismarkaðinn. Þetta kemur fram í tilkynningu sem viðskiptaráðuneytið sendi fjölmiðlum fyrir stundu.

Einnig er þeim tilmælum beint til sömu aðila að fólki í greiðsluerfiðleikum verði boðin sömu úrræði og til staðar eru hjá Íbúðalánasjóði vegna greiðsluerfiðleika. Auk þess er óskum beint til annarra fjármálafyrirtækja að veita sömu fyrirgreiðslu. Tekið er fram að framangreind tilmæli og óskir hafa ekki áhrif á heimild til handa Íbúðalánasjóði til að taka yfir húsnæðislán sem veitt hefur verið af öðrum fjármálafyrirtækjum og gilda á meðan unnið er að yfirfærslu húsnæðislána til Íbúðalánasjóðs.