Fjárhagserfiðleikar SPRON ekki ástæða sameiningar

Samkeppniseftirlitið samþykkti í dag samruna Kaupþings og SPRON á þeim forsendum að SPRON muni að öðrum kosti hverfa af markaði sem sjálfstæður keppinautur. Aðeins vantar nú samþykki fjármálaeftirlitsins til þess að bankarnir tveir geti sameinast.

Guðmundur Hauksson, forstjóri SPRON, neitar því að ástæður sameiningarinnar séu fjárhagserfiðleikar SPRON. Eiginfjárstaða væri góð en hins vegar hefði SPRON þurft að leita til viðskiptabankanna þriggja um endurfjármögnun fasteignalána ef samruninn hefði ekki verið samþykktur.