Tap fyrir Pólverjum

Íslenska kvennalandsliðið í handknattleik tapaði í kvöld lokaleiknum sínum í undankeppni HM þegar það lá 33-32 fyrir Pólverjum.

Liðið hafnar þar með í þriðja sæti riðilsins en þegar í gær var ljóst að liðið næði ekki toppsætinu í riðlinum þegar það tapaði fyrir Slóvökum.

Hanna Guðrún Stefánsdóttir og Dagný Skúladóttir voru atkvæðamestar hjá íslenska liðinu með níu mörk hvor og Berglind Íris Hansdóttir fór á kostum í íslenska markinu og varði 19 skot, þar af tvö víti.

Markvörðurinn Berglind Íris var valin besti leikmaður mótsins og Hanna Guðrún Stefánsdóttir var markahæst, með 42 mörk.