Landsbankinn segist ekki mega tjá sig um mál 365

Landsbankinn hefur sent frá sér yfirlýsingu vegna umræðna á Alþingi og í fjölmiðlum í gær um samskipti bankans og fjölmiðlafyrirtækisins 365. Segir bankinn að honum sé óheimilt samkvæmt lögum að tjá sig um einstök viðskipti eða málefni viðskiptamanna sinna og muni sem fyrr fylgja þeim lögum.

Þá vekur bankinn athygli á því að Jón Ásgeir Jóhannesson, stjórnarformaður 365, hafi lýst því yfir síðdegis í gær að Landsbankinn hefði ekki veitt fyrirgreiðslu vegna viðskiptanna sem þar hafi átt sér stað síðustu daga og að allar upplýsingar um annað væru rangar. Þarna er vitnað til viðtals Vísis við Jón Ásgeir um málið.

„Landsbankinn vill jafnframt taka fram að bankinn kaupir ekki eða selur félög eða fyrirtæki né hefur milligöngu um slíkt nema með skýru umboði frá eigendum viðkomandi félags. Bankinn mun hins vegar sem fyrr vernda viðskiptalega hagsmuni sína og þau verðmæti sem felast í eignum bankans," segir í tilkynningunni.