Glitnir og Byr staðfesta samrunaviðræður

Þar er einnig haft eftir Lárusi Welding, forstjóra Glitnis, að bæði félög séu sterk fjármálafyrirtæki með traust eiginfjárhlutfall. „Náist niðurstaða sem báðum er að skapi, er lagður grunnur að enn sterkara fyrirtæki sem er vel í stakk búið til að athafna sig í því árferði sem nú ríkir á markaði. Sameinað fyrirtæki ætti einnig mikil sóknarfæri þegar markaðir komast aftur í eðlilegt horf. Við förum í þessa vinnu af krafti og könnum þennan kost til hlítar eins hratt og auðið er," segir Lárus.

Ragnar Z. Guðjónsson, sparisjóðsstjóri Byrs Sparisjóðs, segir að Byr standi sterkt þrátt fyrir ágjöf síðustu mánaða. Stjórn félagsins hafi skoðað vandlega þá kosti sem séu í stöðunni og telji að styrkur Byrs verður best nýttur í samstarfi við öflugt fyrirtæki á íslenskum og alþjóðlegum fjármálamörkuðum. „Við höfum því ákveðið að ganga til viðræðna við stjórn Glitnis á þeim forsendum. Eignasöfn beggja fyrirtækja eru góð og félögin eru með sterkan eiginfjárgrunn. Það er því áhugavert fyrir okkur að skoða þennan möguleika ofan í kjölinn," segir Ragnar.

Neitaði samruna fyrir tveimur og hálfum mánuði

Rúmur tveir og hálfur mánuður er frá því að Vísir greindi fyrst frá því að Glitnir og Byr hygðust sameinast, nánar tiltekið 3. júlí. Þá kom fram að það eina sem stæði í vegi fyrir samrunann væri að breyta Byr í hlutafélag. Það hefur nú verið gert.

Þann dag sendi Byr frá sér tilkynningu um að til stæði að kanna kosti hlutafélagavæðingar. Enn fremur sagði í tilkynningunni: „Í skjóli þessa brýna undirbúningsstarfs, virðast hafa sprottið upp fjölmiðlafregnir um fyrirhugaðan samruna Byrs við aðrar fjármálastofnanir. Slíkar fregnir eiga ekki við nein rök að styðjast og harmar stjórn Byrs þessa þróun mála."