Sheik Mohammed Bin Khalifa Al-Thani kaupir 5 prósent í Kaupþingi

Kaupverðið á þessum 5,1% hlut nemur rúmlega 25,5 milljörðum kr.

Sheikh Mohammed segir í tilkynningu um málið að þeir hafi fylgst náið með Kaupþingi í nokkurn tíma og telji þetta góða fjárfestingu.

„Staða Kaupþings er sterk og við höfum trú á stefnu og stjórnendum bankans, enda hefur Kaupþing náð góðum árangri við þær erfiðu aðstæður sem nú eru á markaðnum og sýnt fram á getu til þess að breytast og laga sig að nýjum veruleika í bankastarfsemi. Við lítum á hlut okkar í Kaupþingi sem langtímafjárfestingu og hlökkum til að eiga góð samskipti við stjórnendur bankans," segir Mohammed.

Sigurður Einarsson, stjórnarformaður Kaupþings segir að það sé þeim mikil ánægja að bjóða Sheikh Mohammed Bin Khalifa Al-Thani velkominn í hluthafahóp Kaupþings.

„Það hefur lengi verið stefna okkar að laða nýja fjárfesta að bankanum og því er ánægjulegt að sjá að við höfum nú náð að breikka hluthafahópinn enn frekar. Við hlökkum til þess að vinna með Sheikh Mohammed í framtíðinni," segir Sigurður.