Ticket-hlutur ekki kominn í eigu ríkisins

Vefurinn Standby.dk birtir viðskiptafréttir af ferðaþjónustu á Norðurlöndum. Þar kemur fram að 30 prósenta hlutur í Ticket hafi verið í eigu íslenska félagsins Northern Travel Holding þar til í ágúst að Fons eignaðist hlutinn. Standby heldur því svo fram að Fons hafi ekki getað haldið í hlutinn í Ticket, sem er meðal stærstu ferðaskrifstofukeðja á Norðurlöndum, og hluturinn sé nú í höndum hins nýstofnaða ríkisbanka Landsbankans. Þar með eigi ríkið í raun hlutinn í Ticket. Þá segir á vefnum að Kaupþing hafi einnig átt sjö prósent í Ticket sem einnig sé í eigu ríkisins.

Pálmi Haraldsson, annar eigenda Fons, segir það ekki rétt að hlutur félagsins í Ticket sé í höndum ríkisins. Félagið eigi bréfin en ákveðin mistök hafi verið gerð þegar hluturinn var færður frá Northern Travel Holding til Fons en sú færsla hafi verið í höndum gamla Landsbankans. Þau hafi verið leiðrétt.