Spáir því að einkaneysla muni minnka verulega

Greining Kaupþings gerir ráð fyrir að einkaneysla muni minnka verulega hérlendis á næstunni. Eftir mörg hagsældarár munu íslensk heimili þurfa að draga saman seglin.

"Minnkandi auðsáhrif, brottflutningur vinnuafls, aukið atvinnuleysi og veik króna munu valda samdrætti í einkaneyslu á yfirstandandi ári og því næsta,"segir greiningin í umfjöllun sinni um efnahagshorfurnar framundan.

Greining telur að samdrátturinn verði mun meiri en í síðustu niðursveiflu 2002 og að hann verði snarpari en í niðursveiflunni á fyrrihluta tíunda áratugar síðustu aldar.

Greiningin spáir 4% samdrætti í einkaneyslu í ár og 8,5% samdrætti á næsta ári. Síðan muni hún aukast lítillega árið 2010 eða um 1% þegar lágir vextir og sterkara gengi krónu fer að hafa áhrif.