Lögreglan skoðar atvik í 10/11

Stefán Eiríksson, lögreglustjóri á höfuðborgarsvæðinu, segir að embættið sé að skoða atvik sem varð í 10/11 verslun í gær þegar lögreglumaður tók pilt kverkataki. Atvikið náðist á myndband sem birt var á vefsíðunni Youtube. Þar kemur fram að pilturinn hafi verið grunaður um þjófnað í versluninni. Lögreglumaður ræðir við piltinn sem segist ekki vera með neinn varning á sér. Þá rífur lögregluþjónninn í piltinn og tekur hann kverkataki um leið og hann segir honum að vera ekki með „þennan kjaft".