Heildarskuldir íslenskra heimila nálgast billjón

Heildarskuldir íslenskra heimila við innlánsstofnanir jukust um fjórtán milljarða frá júní til júlí og námu samtals 963 milljörðum í júlí.

Greiningardeild Kaupþings greinir einnig frá því að hlutfall gengisbundinna og verðtryggðra lána hélst nærri óbreytt í júlí borið saman við mánuðinn á undan. Hlutfall gengisbundinna lána hefur þó aukist mikið það sem af er ári, í janúar námu gengisbundin lán 17% af heildarskuldum heimilanna en nema nú 23%. Skýrist aukningin að mestu leiti af gengisfalli krónunnar í mars síðastliðnum.

Heildarskuldir fyrirtækja lækkuðu hins vegar um ellefu milljarða milli mánaða. Skuldir fyrirtækja hafa hins vegar verið að aukast jafnt og þétt það sem af er ári líkt og skuldir heimila og nemur vöxtur heildarskulda 35% það sem af er ári.

Greiningardeild kaupþings segir jafnframt frá því að á síðustu misserum hafi fjármálaleg skilyrði farið ört versnandi. „Lausafjárskortur hefur einkennt fjármálamarkaði og leitt til þess að útlán bankakerfisins til íslenskra heimila og fyrirtækja hafa verið af skornum skammti. Á sama tíma hefur höfuðstóll gengisbundinna lána hækkað fyrir tilstilli veikari krónu og leitt til aukinnar greiðslubyrði. Þrengingar á fasteignamarkaði hafa í för með sér að dregið hefur úr seljanleika fasteigna. Heimilum er því mjög erfitt um vik að losa fjármagn með sölu eigna, sé þess þörf, til að mæta auknum afborgunum lána."