Seðlabankinn hafnar tilboðum í rúmlega helming ríkisbréfa

Seðlabanki Íslands hélt í dag útboð í tvo flokka ríkisbréfa. Eftirspurn virðist hafa verið sæmileg í útboðinu því alls bárust tilboð fyrir 20,1 milljarð kr. Það vekur hins vegar athygli að Seðlabankinn skuli einungis taka tilboðum fyrir níu milljarða kr..

Greining Kaupþings fjallar um málið í Hálf fimm fréttum sínum. Þar segir að gífurleg eftirspurn myndaðist eftir ríkisbréfum fyrr á árinu þegar kjör á gjaldeyrisskiptamarkaði versnuðu til muna. Nú hafa sömu aðstæður komið upp aftur og krónan hefur fallið mikið vegna þess hve lágir krónuvextir bjóðast á gjaldeyrisskiptasamningum.

„Niðurstaðan í útboðinu virðast benda til þess að áhugi eftir nafnvaxtabréfum sé að einhverju leyti að dvína. Einnig er vert að benda á að ekki var framlengt öllum innstæðubréfum Seðlabankans sem féllu á gjalddaga í gær," segir í Hálf fimm fréttum. „Af þeim 75 milljörðum innstæðubréfa sem voru á gjalddaga var einungis 66 milljörðum framlengt á 15,25% vöxtum."

Greining nefnir einnig að samkvæmt nýbirtum Hagvísum Seðlabankans hefur stöðutaka með krónunni - sem birtist í framvirkri stöðu bankakerfisins - minnkað um 50 milljarða kr. á breytilegu gengi fram til 19. september. Staðan hefur því væntanlega minnkað um rúmlega 100 milljarða kr. á breytilegu gengi og er það ákveðin vísbending um að erlendir fjárfestar hafi lokað stöðum sínum í krónunni og leiti síður eftir ávöxtun í ríkisbréfum.