Saga Capital bregst við veðkalli - Ákvörðun FME kemur verulega á óvart

Saga Capital hefur í dag orðið við veðkalli Seðlabanka Íslands frá því í gær og lagt fram viðbótarveð í formi reiðufjár og ríkisskuldabréfa í samræmi við reglur Seðlabankans. Þetta kemur fram í tilkynningu frá bankanum en í henni undrast forstjóri Saga Capital ákvörðun Fjármálaeftirlitsins.

„Skuldsetning Saga Capital er lítil og lausafjárstaða góð og því átti bankinn ekki í erfiðleikum með að verða við veðkalli Seðlabankans að þessu sinni," segir í tilkynningunni. Þá segir að veðkall Seðlabankans hafi komið í kjölfar ákvörðunar Fjármálaeftirlitsins um að skuldabréf á hendur gömlu viðskiptabönkunum færu ekki yfir í nýju ríkisbankana.

Sú ákvörðun FME kemur Þorvaldi Lúðvík Sigurjónssyni, forstjóra Saga Capital verulega á óvart, enda kúvending á fyrri ákvörðun að hans sögn.

,,Við erum að fara yfir málið og meta hugsanlegar afleiðingar, en Saga Capital er ekki í neinni hættu ef staðið er við gerða samninga. Það er ekki gott að átta sig á regluverkinu þessa dagana en ég treysti því og trúi að eftirlitsaðilar og ráðamenn séu að vinna ötullega að lausnum," segir Þorvaldur Lúðvík.