Erlend lán heimilanna hækkuðu um 7,5 milljarða kr. í morgun

Erlend lán heimilanna í landinu hafa hækkað um 7,5 milljarða kr. frá því að gjaldeyrismarkaðurinn opnaði í morgun.

Samkvæmt umfjöllun í Morgunkorni greiningar Glitnis nema erlend lán heimilanna nú um 250 milljörðum kr. Og gengið hefur lækkað um 3% frá því í morgun.

Greining Glitnis segir að útlán innlánsstofnanna til heimila í landinu hafi aukist í ágústmánuði. Skuldir heimilanna við innlánsstofnanir námu um 1.000 milljörðum kr. í lok ágúst, en þar af voru 237 milljarðar kr. vegna gengisbundinna skuldabréfa og tæplega 6 milljarðar kr. vegna yfirdráttar í erlendri mynt.

Jafnframt má ætla að 70%-80% eignaleigusamninga heimila við bankakerfið (20,8 milljarðar.kr.) sé gengisbundin. „Gengistengdar skuldir heimila voru því nálægt 25% af heildarskuldum við innlánsstofnanir í lok ágústmánaðar," segir í Morgunkorninu.