Vodafone segir upp 20 manns

Fjarskiptafyrirtækið Vodafone sagði í dag upp 20 starfsmönnum og hafa þeir þegar látið af störfum en fá greidd laun sinn uppsagnarfrest. Fólkið kemur úr hinum ýmsu deildum fyrirtækisins en hjá því starfa um 350 manns.

Hrannar Pétursson, upplýsingafulltrúi Vodafone, segir miður að til uppsagnanna hafi komið en til þeirra hafi verið gripið vegna versnandi rekstrarskilyrða. „Við förum ekki varhluta af því fremur en aðrir og það hefur valdið miklum kostnaðarhækkunum í rekstrinum," segir Hrannar. Hann segir fyrirtækið þegar hafa gripið til ýmissa aðgerða í rekstrinum til þess að bregðast við breyttum rekstrarskilyrðum og bendir á að stór hluti af kostnaði fyrirtækisins sé í erlendri mynt. „Það eitt og sér veldur miklum hækkunum í rekstrinum," segir Hrannar. Aðspurður segir hann ekki von á frekari uppsögnum.