Ellefu íslendingum sagt upp hjá Primera Air

Ellefu flugliðum sem starfa hjá íslenska flugfélaginu Primera Air sem meðal annars sér um allt leiguflug Heimferða hefur verið sagt upp störfum. Jón Karl Ólafsson forstjóri Primera Air segir að um varúðarráðstafanir sé að ræða en félagið hefur fundið fyrir samdrætti undanfarið.

Flugliðarnir ellefu hafa fengið uppsagnarbréf en eru með þriggja mánaða uppsagnarfrest. Jón Karl vonast til þess að gengisþróunin lagist og flugliðarnir þurfi ekki að hætta störfum.

Primera Air sem áður hét Jetx er að meirihluta í eigu Primera Travel Group sem er móðurfélag Heimsferða. Starfsemi félagsins hér á landi er innan við 10% en hjá félaginu starfa um 250 flugliðar.

Jón Karl segir að félagið hafi fundið fyrir samdrætti í takt við ástandið í efnahagslífinu. Gengið hefur einnig farið illa með fyrirtæki í flugbransanum og bendir Jón Karl á að gengið hafi fallið um rúmlega 70% á skömmum tíma. Þessar aðgerðir eru því fyrst og fremst hugsaðar sem varúðarráðstafanir.