Þingfestingu í ákæru á hendur Benjamín Þór aftur frestað

Fresta varð í morgun í annað sinn á skömmum tíma þingfestingu í máli ákæruvaldsins á hendur Benjamín Þór Þorgrímssyni líkamsræktarþjálfara fyrir að hafa hótað og barið Ragnar Ólaf Magnússon. Fjallað var um árásina í Kompásþætti fyrr í haust þar sem tekinn var fyrir heimur handrukkara.

Ákæran á hendur Benjamín er í þremur liðum. Lýtur hún í fyrsta lagi að hótunum Benjamíns í garð Ragnars áður en hann réðst á hann og í öðru lagi að árásinni sjálfri. Samkvæmt ákærunni sparkaði Benjamín í Ragnar, tók hann hálstaki og þrýsti honum niður til jarðar. Þá sparkaði hann nokkrum sinnum í höfuð Ragnars þar sem hann lá í jörðinni, kýldi hann í andlitið auk þess sem hann kýldi hann hnefahöggum í líkama. Þetta varð til þess að Ragnar hlaut kúlu vinstra megin á enni, heilahristing, eymsli í hársverði vinstra megin á höfði, tognun í brjóstkassa og tognun í hálsvöðvum.

Ákæran á hendur Benjamín er byggð á upptökum Kompáss af árásinni en Benjamín hefur boðað skaðabótamál á hendur Kompási fyrir að birta myndbandið.

Í þriðja lagi er Benjamín ákærður fyrir að hafa ráðist á annan mann í byrjun júlí á barnum á Hilton-hótelinu. Benjamín á að hafa kýlt hann hnefahöggi í andlit og svo kýlt hann aftur í hægri vanga með þeim afleiðingum að fórnarlambið hlaut bólgu á gagnaugasvæði hægra megin sem teygði sig upp í hársvörð, bólgu framan við hægra eyra og niður eftir neðri kjálka, eymsli í kjálka og í hálsvöðvum hægra megin og heilahristing.

Til stóð að þingfesta ákæruna á hendur Benjamín í síðasta mánuði en það var ekki hægt því Benjamín var í útlöndum. Hann mætti ekki við þingfestingu í morgun og var henni því frestað aftur, í þetta sinn til 27. nóvember.

Umfjöllun Kompáss um fyrrnefnda málið má nálgast hér.