Fitch mælir með enn einni stýrivaxtahækkun

Seðlabanki Íslands á að hækka stýrivextina til þess að koma í veg fyrir að krónan veikist meira en orðið er. Þetta segir Paul Rawkins, yfirmaður hjá greiningafyrirtækinu Fitch Ratings í London í viðtali á Bloomberg. Hann segir þetta nauðsynlegt í ljósi þess að krónan hefur veikst á síðustu dögum í kjölfar þess að ríkið gerði yfirtökutilboð í Glitni og lánshæfismat banka og ríkis voru lækkuð.

„Með því að hækka vextina á ný gæti Seðlabankinn sett gólf undir Krónuna," segir Rawkins. „Þetta gæti hjálpað til við að vega á móti verðbólguþrýstingi innanlands en þetta gæti einnig flýtt fyrir harðri lendingu í efnahagslífinu."

Bloomberg bendir á að krónan hafi veikst um 8,3 prósent gagnvart evru á þeim tíma sem liðinn er frá því tilkynnt var um yfirtöku ríkisins á Glitni. Það hafi aftur orsakað að lánshæfismat allra bankanna var lækkað.

Rawkins segir að slæmt ástand krónunnar komi fljótt fram í verðbólgu og því hafi þrýstingur á Seðlabankann aukist. „Þeir gætu þurft að hækka vextina enn á ný."

Áætlanir bankans gerðu ráð fyrir því að stýrivextir gætu farið að lækka í mars á næsta ári en Rawkins segist efast um að hægt sé að slá því föstu að vaxtahækkunarferlið hafi stöðvast, í ljósi aðstæðna á fjármálamörkuðum heimsins. „Möguleikar Seðlabankans til þess að byrja að lækka vextina í mars hljóta að vera mjög takmarkaðir," segir hann. Hann bætir því við að þrátt fyrir að bankinn vildi lækka vextina á einhverjum tímapunkti verði hann að huga að utanaðkomandi þáttum. „Bankinn verður að laða til landsins erlent lánsfé."

Næsta vaxtaákvörðun Seðlabankans verður að öllum líkindum tilkynnt þann 6. nóvember næstkomandi.