Nýsköpun í kreppunni

„Við önnum varla eftirspurn, eins og er,“ segir Valur Þór Gunnarsson, höfundur Kreppuspilsins, en fyrsta upplag kom í verslanir fyrir um viku, eftir að það hafði selst upp í forsölu.

Kreppuspilið hefur enda vakið þó nokkra athygli frá því að fyrstu fréttir bárust af framleiðslunni undir lok nóvember síðastliðins. Munu yfir 20 erlendir fjölmiðlar hafa sett sig í samband við aðstandendur spilsins og viljað fjalla um það. Þar á meðal má nefna Financial Times og eitt stærsta dagblað Finna.

Valur segir framleiðsluna hafa gengið vel enda hafi bæði vinir og ættingjar verið virkjaðir í pökkunarvinnu. „Og það hefur skilað sér í skemmtilegu framleiðsluferli og algjöru kreppuverði.“

Tölvuleikja- og sprotafyrirtækið Gogogic hannar og gefur spilið út, en í nýlegri tilkynningu fyrirtækisins kemur fram að það sé að öllu leyti framleitt hér á landi og að hönnun þess hafi frá upphafi miðast við að halda kostnaði í lágmarki „en skemmtun í hámarki“.

- óká