Seðlabankinn tjáir sig ekki um aðstoðina við Norðurlöndin

„Að svo stöddu er ekki að vænta yfirlýsingar Seðlabanka Íslands um gjaldmiðlaskiptasamninga bandaríska seðlabankans við seðlabanka nokkurra landa sem tilkynnt var um í morgun."

Þannig hljóðar svar frá bankastjórn Seðlabankans við fyrirspurn frá Vísi um það af hverju bankinn er ekki með hinum norrænu löndunum í nær 2.000 milljarða króna gjaldmiðlasskiptasamningum bandaríska seðlabankans.

Fjallað er um málið hér í viðskiptafréttum Vísis. Þar segir m.a. að í tilkynningu frá bandaríska seðlabankanum komi fram að aðgerðin sé liður í aukinni samvinnu seðlabanka víða um heim til að komast í gegnum þá erfiðu tíma sem nú ríkja og að seðlabankinn sé tilbúin að taka frekari skref í þessa átt ef þörf er á.

Í fyrirspurn Vísis til Seðlabankans var annars vegar spurt um af hverju Ísland væri ekki með í hópnum og hins vegar hvort Íslandi hefði staðið slíkt til boða.