City með risatilboð í Buffon?

Þær sögusagnir gerast æ háværari að Manchester City sé með í undirbúningi risatilboð í Gianluigi Buffon, markvörð Juventus á Ítalíu. Ekkert hefur verið staðfest í þessum efnum en ítalskir fjölmiðlar telja þetta líklegt.

Vitað er að eigendur City ætla að styrkja liðið verulega í janúar og hafa til þess nær ótakmarkað fé. Buffon hefur sjálfur sagt að það væri heimska hjá félaginu að hafna risatilboði í sig, hann sé ekki nauðsynlegur fyrir liðið og ef það fáist kringum 50 milljónir punda fyrir sig væri hægt að styrkja liðið verulega.

Nýjustu fréttir herma að City sé tilbúið að greiða ansi háa upphæð fyrir Buffon og gera hann að einum launahæsta leikmanni heims.