Mesta lækkun úrvalsvísitölunnar á einum ársfjórðungi

Íslenska úrvalsvísitalan lækkaði um 22,4% á þriðja ársfjórðungi og kemur sú lækkun í kjölfar 13,3% lækkunar á öðrum fjórðungi ársins. Um er að ræða mestu lækkun sem orðið hefur á einum ársfjórðungi í kauphöllinni.

Greining Glitnis fjallar um málið í Morgunkorni sínu. Þar segir að frá áramótum hefur íslenska vísitalan lækkað um 46,2%. Miklar lækkanir hafa einkennt flesta hlutabréfamarkaði víða um heim undanfarna mánuði.

Þegar norrænir hlutabréfamarkaðir eru skoðaðir kemur í ljós að hlutabréf lækkuðu mest í Noregi eða um 31,5% en þar á eftir kemur íslenska vísitalan. Finnska vísitalan lækkaði um 19,1% á fjórðungnum, sú danska um 17,2% og sú sænska um 10,4%.

Af einstökum félögum í kauphöllinni lækkaði Eimskip mest eða um 72% á fjórðungnum. Glitnir lækkaði um 70,5% og Century Aluminium um 48,4%. Icelandair og Eik Bank eru einu félögin sem hækkuðu í verði á fjórðungnum, Icelandair hækkaði um 13,3% og Eik Bank um 12,7%.