Greiningardeildir benda á loðið orðalag hjá Seðlabankanum

Greiningardeildir bæði Kaupþings og Landsbankans telja ástæðu til að benda á loðið orðalag í fréttatilkynningu Seðlabanka Íslands um viðræðurnar við Seðlabanka Bandaríkjanna.

Í Hálf fimm fréttum greiningar Kaupþings segir að í yfirlýsingu sem birtist á vefsíðu Seðlabankans Íslands (SB) eftir lokun markaða í dag kom fram að SB hafi átt í viðræðum við Seðlabanka Bandaríkjanna um gerð álíkra gjaldmiðlaskiptasamninga og aðrir norrænir Seðlabankar hafa gert við hann. Það er Svíþjóð, Danmörk og Noregur.

Orðrétt segir síðan. „Ekki voru taldar ástæður eða efni til þess að gera á þessu stigi samning við Seðlabanka Íslands. Alls ekki væri þó útilokað að slíkur samningur yrði gerður síðar ef aðstæður gefa tilefni til."

Þessi yfirlýsing Seðlabanka Íslands er því torskiljanleg þar sem ekki kemur fram hvor aðilinn taldi ekki ástæðu til þess að gera slíkan samning.

Ljóst er að frá sjónarhóli Íslendinga hljóta „ástæður og efni" að vera fyrir slíkum samning þar sem nú ríkir lausafjárkrísa á erlendum mörkuðum, nafngengi krónu er undir þrýstingi og raungengi krónu er í sögulegu lágmarki. Hér gildir hið fornkveðna að oft var þörf en nú er nauðsyn.

Þessi yfirlýsing er því nokkuð tvíræð - en sýnir kannski einna helst að enn sé langt bíða einhverra aðgerða frá Seðlabanka Íslands á gjaldeyrismarkaði.

Greining Landsbankans segir í Vegvísi sínum um fyrrgreind setningu í tilkynningu Seðlabankans: "Ekki er hægt að skilja þetta öðruvísi en að það hafi verið bandaríski seðlabankinn sem taldi ástæðulaust að greiða fyrir aðgangi þess íslenska að Bandaríkjadölum."