Ásgeir: Maður kemur sterkari út úr þessu

"Þetta var löngu planað," sagði Ásgeir og hló. "Maður varð að mæta óttanum og vippa aftur. Það var pressa á mér að standa mig og ég er ánægður með þetta. Ég var helvíti langt niðri eftir Kóreuleikinn en maður kemur sterkari út úr þessu."

"Ég komst ekki í takt í byrjun. Var allt of æstur og ætlaði að verja alla bolta. Svo náði ég hjartslættinum niður og komst vel í gírinn," sagði Hreiðar Guðmundsson markvörður sem fann sig mjög vel eftir því sem leið á leikinn gegn Dönum en hann byrjaði leikinn á bekknum.

"Það er snilld að vera búinn að tryggja átta liða úrslitin. Mér er alveg sama hvaða lið við fáum. Það verður bara verkefni eins og hvert annað. Þýðir ekkert að segja að maður vilji alls ekki fá hitt eða þetta liðið. Svo mætum við því liði og maður kemur ekkert sérstaklega vel út," sagði Hreiðar brosmildur.