Jón Ásgeir: Fjárfesting í Stoðum var mistök

„Þegar ég horfi á stöðu Stoða í dag er auðvelt að dæma þá fjárfestingu sem mistök," segir Jón Ásgeir Jóhannesson, stjórnarformaður Baugs, í opnugrein sem hann skrifar í Morgunblaðið í dag.

Í greininni fer hann yfir viðskiptaferil sinn síðustu 20 ár, fjárfestingar sínar, átök sín fyrir dómstólum og samskipti við stjórnvöld. „Í sumum tilvikum fór ég of geyst og fjölmiðlaútrásin, Nyhedsavisen-ævintýrið, er til dæmis um það. Þegar ég horfi á stöðu Stoða í dag er auðvelt að dæma þá fjárfestingu sem mistök. Þegar ég lít yfir völlinn viðurkenni ég að hafa almennt lagt of mikla áherslu á sóknina og gætt ekki nægilega vel að vörninni. Þar liggur mín ábyrgð og afleiðingar hennar axla ég," segir Jón Ásgeir.

Jón Ásgeir segir það vera hreina fjarstæðu að hann beri ábyrgð á að hafa upp á sitt einsdæmi fellt íslenska fjármálakerfið eins og fjölmargir haldi fram Í grein sinni segir Jón Ásgeir að skuldir Baugs séu nokkur prósent af því sem heildarskuldir bankanna hafi verið. Hann segist efa að þær skuldir séu ástæðu vandræða Íslendinga nú. „Vissulega eru mörg fyrirtæki sem tengjast mér í vanda þessa dagana, eins og nær öll fyrirtæki í landinu. En það er afleiðing af hruni efnahagslífsins, ekki orsök þess. Bankarnir hrundu yfir fyrirtækin, ekki fyrirtækin yfir bankana," segir Jón Ásgeir.