Kaupþing býður aftur út sértryggð skuldabréf vegna íbúðalána

Kaupþing ætlar að bjóða út sértryggð skuldabréf með lánshæfismat Aaa frá Moody's til fagfjárfesta vegna fjármögnunar á nýjum íbúðalánum.

Í tilkynningu frá bankanum segir að þetta sé í samræmi við þá stefnu bankans að útboð á sértryggðum skuldabréfum til fjármögnunar á nýjum íbúðalánum fari fram að lágmarki ársfjórðungslega.

Bréfin eru með lokagjalddaga annars vegar 2033 og hins vegar 2048, verðtryggð með föstum vöxtum út lánstímann og skráð á OMX Nordic Exchange á Íslandi.

Í samkonar útboði í sumar var fjárfest í þessum skuldabréfum upp á 4,8 milljarða kr.

Vextir á nýjum íbúðalánum Kaupþings ráðast af niðurstöðu útboðsins, að viðbættu 90 punkta álagi. Markmið bankans með þessu fyrirkomulagi er að auka gegnsæi í vaxtamyndun á íbúðalánum bankans. Útboðið verður með áskriftarfyrirkomulagi og stendur til klukkan 16:00 á föstudag.