Krónan yfir 250 stig í fyrsta sinn

Gengisvísitala krónunnar veiktist um 4,04 prósent í gær frá fyrra viðskiptadegi. Vísitalan fór í fyrsta sinn yfir 250 stig, en sérfræðingar höfðu spáð nokkurri veikingu eftir að hún yrði sett á flot á markaði á ný. Við lok viðskipta á föstudag var gengisvísitala krónunnar 242,3, en 252,1 stig í gær.

Lög um höft á gjaldeyrismarkaði sem samþykkt voru aðfaranótt föstudagsins síðasta stemma stigu við mjög örri lækkun krónunnar, að mati Greiningar Glitnis.

„Þó svo að höft séu á fjármagnsflutningum er krónan á floti. Hið nýja gjaldeyriskerfi sem komið var upp í lok síðustu viku gerir það að verkum að verð krónunnar ákvarðast á markaði þar sem gjaldeyristekjur og -gjöld vegna vöru- og þjónustuviðskipta ákvarða gengi krónunnar að viðbættum gjaldeyrishreyfingum vegna vaxta, verðbóta, arðs, hagnaðarhluta af fjárfestingum og samningsbundinna afborgana,“ segir í umfjöllun Greiningar.

Í nýju umhverfi gjaldeyrisviðskipta hér á landi hefur flot krónunnar hins vegar verið nefnt „hálfflot“, eða flot með ankeri. Samkvæmt heimildum blaðsins liggja litlar upplýsingar fyrir um magn og eðli þeirra gjaldeyrisviðskipta sem átt hafa sér stað síðan á föstudag, en þær eru á forræði Seðlabankans. Þó er talið að um frekar smáar færslur sé að ræða og að heildarvelta krónunnar frá því að hún var sett á flot sé innan við milljarður.

Í gjaldeyrisviðskiptum gærdagsins slagaði gengi evrunnar í 190 krónur, Bandaríkjadalur daðraði við 150 krónur og verð dönsku krónunnar fór yfir 25 íslenskar.

Í umfjöllun Greiningar Glitnis kemur jafnframt fram að fyrirséð sé að á næstunni verði gjaldeyristekjur vegna vöru- og þjónustuviðskipta við útlönd meiri en gjöld.

„Ef allar gjaldeyristekjur skila sér inn á markaðinn með þeirri skilaskyldu sem fest hefur verið í lög mun smátt og smátt verða til umframgjaldeyrir í þessum viðskiptum.“

Mat greiningardeildarinnar er að hluti umframgjaldeyrisins komi til með að fara í þau fjármagnsviðskipti sem heimil séu. „Hitt verður hægt að nýta til að selja erlendum aðilum og losa þá þannig út úr krónustöðum sínum. Þannig verður hægt að vinda ofan af hættunni á hraðri og mikilli gengislækkun krónunnar í því fullkomna floti sem stefnt er að.“