Húsnæðislán bankanna nema 500 milljörðum króna

Greiningardeildin bendir á að ekki sé tekið til í lögunum sjálfum hvers konar lán sé um að ræða en í athugasemdum með frumvarpinu sé lagt til að ráðherra geit sett frekari fyrirmæli í reglugerð. „Framkvæmd yfirtöku lána í innlendri mynt liggur nokkuð beint fyrir þar sem unnt er að fjármagna hana með útgáfu íbúðabréfa. Framkvæmd yfirtöku lána í erlendri mynt á eftir að útfæra nánar, meðal annars með tilliti til þess hvort lánað verði áfram í erlendri mynt eða hvort skipt verður yfir í krónur. Óvissa í þeim efnum snýr bæði að fjármögnum ÍLS á lánunum sem og útfærslu sem snýr að lántaka sjálfum. Verði skipt yfir í krónur er spurning á hvaða gengi skiptin munu fara fram," segir greiningardeildin.

Hún bætir við að fjármögnun Íbúðalánasjóðs vegna þessa verði væntanlega mætt með aukinni útgáfu íbúðabréfa. „Samkvæmt tölum Seðlabankans um bankakerfi námu verðtryggð húsnæðislán bankanna tæplega 500 mö.kr. í lok ágúst. Ef stærstur hluti þeirra lána verður fluttur undir hatt ÍLS má reikna með miklu framboði nýrra íbúðabréfa á næstu dögum og vikum. Væntingar um aukið framboð íbúðabréfa kom strax fram í kröfuþróun en krafa íbúðabréfa hækkaði strax í upphafi dags um 23-98 punkta," segir í Morgunkorninu.

Greiningardeildin telur um jákvæðar aðgerðir að ræða og þær muni koma sér vel fyrir heimilin. „Í niðursveiflu eins og líklegt er að víð séum að sigla inn í er mikilvægt að skaði heimilanna verði sem minnstur. Niðursveiflur í hagkerfum sem rekja má til niðursveiflu á húsnæðismarkaði eru gjarnan bæði dýpri og lengri en niðursveiflur sem snerta ekki húsnæðismarkaðinn. Aðgerðir stjórnvalda til að bægja erfiðleikum á fjármálamarkaði frá húsnæðismarkaði og þar með heimilunum dregur því úr hættu á miklum og löngum samdrætti í hagkerfinu," segir greiningardeild Glitnis.